خليك عنى بعيد..مرتاح عايش سعيد..حابب واحد باعك وناسى واحد شاريك
خليك هناك وسامع..صوتى بيندهلك..وعيش وحدك ممانع لقلبى يسمعلك
عيش لوحدك.....داوى جرحك....نستنى وانا......جوايا فرحك
خليك وحيد.......عايش بعيد.....تتمنى قربى......وألمك يزيد
زمان انا كنت فاكرك ملاك وليه جناحين..ضميتك وقولت احبك..بعتنى وبعت السنين
نسيت لما زمان..قلبك جرح فيا..ولما قلت حرام..زودت الألم عليا؟
جالك قلب تأسى عليا..تسبنى لوحدك وتبكى عنيا
تبعد عنى يوم..وترفض اى لوم..وتنسى ان قلبى منك كان مظلوم
ولما أقول بحبك..تبد تحكيلى كدبك..وترسم عليا لؤمك..وتقولى قال ايه بحبك
جالك قلب..
قالت حبتنى بقلبها..وأتاريه ماكنش ملكها..وكنت انا المداوى..وقت ما بان جرحها
اصل كده الدنيا..فرحة فى عين تمر فى ثانية..ودمعة حزينة فى العين التانية
جالك قلب..
وفى النهاية ظهرت حقيقتك..انسان خداع وانا كرهتك
يمكن كتير عليك انسان..لان القلب محتاجله كيان
وانت مالكش قلب..انسى انك تحب
يمكن تعيش سعيد..لكن جواك وحيد..لأنك ظالم اكيد
وجالك قلب.......تسبنى احب.........فى وهم وكدب
يا ترى وانت بتسمعنى..عرفت مين بيخدعنى..ولا نسيت مين ودعنى
يا ترى وانت بتسمعنى..عرفت مين ظلمنى..مين بعد ومين كسرنى
انتهت خيانتك بكلمة سامحنى..انتهت وعمر قلبى ما هيسمحلى..انى عشانك ارجع وأسامح..وأقبل منك كلمة سامحنى...
خيانتك كانت منك ليك..قلب انجرح عشان يرضيك..قلبى عليك ينسى ويأسى..وروحى أسيرة فى حضن عنيك
خيانتك كانت عشان هواك..ضيعت مكانك يوم لؤاك..هديت حياتى قدام عنيا..هديتها وكنت فكرك ملاك
ضحيت عشانك بكل حاجة كانت ليا..نسيت وكان قدامك.. كل قديم فى
لياليا..لا عمرى قلت عليك خاين..ولا عمرى حكيت عن جرحك فيا
وراجع ليا تقول سامحنى..كدبة جميلة فى وهم جرحنى..ضحكة بريئة على قلبى بتدبحنى...
حاولت أضمك فى حضنى من غير ما تكون نهاية....حاولت أقولك يا عمرى..عمرى فى حبك مش كفاية...لا هنسى يوم فى حبك جمعنا..ولا هنسى ظلمك من البداية
وراجع ليا تقول سامحنى..كدبة جميلة فى وهم جرحنى..ضحكة بريئة على قلبى بتدبحنى...
راحت مش هسأل مالك..لا ايه اللى جرى ولا غير حالك..خاين بالرخص باع وخنى..وسبنى غريق فى وهم جمالك
طبعآ عارف لما الشوق بيتحكم..طبعآ عارف وعارف ان حبيبى بيتألم..طبعآ عارف.. وعرفت لما منى اتمكن
عرفت ساعتها ان الالم مش مجرد كلمة بتتقال..عرفت ان الوجع مش حكاية دوا وحكيم وموال..عرفت..وياريتها سامعه الكلام
الشوق لما بيتحكم يا حبيبى..يعنى هواكِ يروح لبعيد..لا هو طايل يكون سيد.. ولا طايل يكون واحد من العبيد
الشوق لما بيتحكم..يعنى الألم يكون عنوانك..السحر والخيال أمراء وجدانك..ولما تفكر انك تسرح..تبقى بتهزر لأنك مش سُلطانه
الشوق يا حبيبى هو السلطان..ملك سارق كل الاحضان..حضنى وحضنك يا حبيبى..وحضن كل انسان
صدقنى عارف يعنى ايه..صدقنى عايش فى ظلام لياليه..لكن وحياتك عندى..لأحكيلك على اللى انا فيه
انت ظالمنى..وناسى انك منى..وناسى انك زمان..كنت بتاخد زى ما بتدى
يمكن اكون غلطان..تايه سارقانى الدنيا والايام..لكن عارف ومتأكد..انك منى لسه زعلان
وطبعآ عارف إحنا لبعض..لا هيفرق ما بينا سما ولا تبعد ما بينا ارض..لأن الشوق لما بيتحكم..لا بيفرق معاه سلطان ولا يفرق معاه عبد
وانا يا حبيبى عشانك مستنى..لا هرتاح ولا هيرتاح معايا قلبى..عشانك اتعذب وأتألم..واعيش وانت جانبى
ومسيير الأحضان تتلاقى..ونتجمع احنا التلاتة..انا وانتى والشوق..وعيالنا ورانا تاتا تاتا
مسيير الشوق يقرب ما بينا..مسيير الليالى تنور فى عيونا..مسيرها يا حبيبى والشوق.. يكون نصيبنا
ونصيبك حبيبى صدقينى معايا..مشتاق عشانك وقاتلنى هوايا..يا عيونى انتى جمالك..يشق القلب الحجر وتغيير منه الصبايا
جمال الكلام سحر القوام..ودلال العيون والقلب الحنون..اوعى تستغربى..انا مش مجنون
ماكنتش عايز قلبى يتكلم..لكن ماقدرتش..عارفة ليه؟
عشان لما الشوق بيتحكم...والقلب منه ليه يستسلم..انده بعلو صوتى وأقولك..سامحينى حبيبى واسمحيلى أتظلم!
أتظلم منك ليكى..واشتاق واحب على اديكى..وابوسها ولا اخجل منك..ما انا مابشوفش فى الدنيا............ الا عنيكى
وطبعآ عارف.........!
كان ليلة انتظار النتيجة, كأنك قاعد مستنى مصيبة, وساعة ما الخبر المنتظر وصل, ولا كأن اللى وصل عيبة
حضن الاب ابنه, وقاله يا ابنى ماتقلقش, قرب وقاله فى ودنه, نام بدرى وماتسهرش
صحى الواد ابو خمسين فى المية, يلاقى نفسه هوبا فى الداخلية, بدلة نضيفة عليها القيمة, وامه تقوله مش مصدقة عنيا
مكتب وشغل وحركات, وكلام فاضى واشتغلات, وطبنجة ماشى بيها, ولا كبير البهوات
طيب وبعدين يعمل ايه الولد؟, قالوله هتحارب اعداء البلد, الناس اللى بترمى علينا الطوب والزلط
فرح الواد ونزل يحارب, عالناصية وقف مستنى العدو, مواصفاته سهلة دقن وشارب, وشكل العملية هتكبر وتحلو
وعدى عليه أول زبون, راجل يا عينى ماشى فى حاله, قاله تعالى يا اب المتاكة, من غير ما نضيف حرف النون
أمر عساكر الشطرنج عشان يشدوه, وعالقسم المحترم خدوه وقلعوه, وبعصاية ولا بكرباج, عالمؤخرة و يروقوه
وفى ظل التكنولوجيا, قالك نستخدمها بضمير, احنا ناس فاضيا, والزبون شكله فقير
تعالى نصوره واحنا بنروقه, وعلى صحابه وحبايبه, نوريهم واحنا بنهزأه
وبعد ما انتهت الليلة, روح يا عينى الظابط, شايل هموم كتيرة, شايل هم أعداءه بجانب البطيخة الكبيرة!
ربنا يباركلكم فينا, يا خير من جابت أراضينا, مين غيركم ياخدنا فى حضنه, مين غيركم فى المؤخرة هيدينا؟!
احنا المحبوطين, عايشين متبهدلين, شايفين الدنيا كحل, شايفين الدنيا طين
احنا معَلمين, يعنى كبار الحتة, على النواصى ملأحين, من واحدة الصبح للساعة 6
احنا بتوع النت, واكلين دماغ البت, عايشين فى دنيا تانية, يلا صباح الزفت
بالليل بنتصبح, والدنيا بتحلو, والصبح بنترنح, صباح التلالو
بنشوف بعض عالمسنجر, وعايشينها اون لاين, نتفرج على كارتون ماسنجر, وحالنا "فاين فاين"
المستقبل يعنى احنا, الدنيا بتتعطر من ريحنا, واليابااااان, قريب هتبقى فى ريحنا
فى ريحنا يعنى حادانا, الدنيا كلها مش سيعانا, مافيناش واحد طخين, لكن افكارنا مبواظانا
عندنا الناس مقامات, واحد فينا جنرال, وواحد "خد وهات", تقدر علينا تقول, كلــــــــــنا بهوات
